Atur pambagya saking pangarsaning panitia syawalan

Atur pambagya saking pangarsaning panitia syawalan wonten Jurusan Pendidikan Bahasa Daerah

Assalamu’alaikum Warahmatullahi Wabbarokatuh.

Dhumateng Bapak pangarsaning jurusan PBD ingkang dahat kinutmatan,

Dhumatheng Bapak Ibu dosen ingkang kula hormati,

Saha kadang mahasiswa ingkang tansah minulya.

Sederenipun acara menika kawiwitan, sumangga kula lan panjenengan ngaturaken raos puji syukur dhumateng Gusti Alloh SWT ingkang sampun maringi kasarasan sahengga kula lan panjenengan saged kempal wonten adicara saresehan kanthi lir ing sambekala.

Sholawat saha salam tansah kita ujukakaen dhumateng Nabi Agung Muhammad SAW, mugi-mugi kula lan panjenengan tansah pikantuk syafaatipun  fidunya wal akhiroh, amin.

Keparenga kula atas namining panitia syawalan ngaturaken panbagya kasugengan rawuh panjenengan sedaya saha ngaturaken agunging panuwun dene panjenengan sedaya sampun kersa rawuh wonten adicara syawalan meniko.

Sumangga sakecakana lenggahipun kanthi mardikaning wardaya, ngantos  dumugi purnaning adicara ing mangke.

Para arawuh ingkang minulya, namung mbok bilih wonten kirang ing trapsila anggen kula nampi lan ngancani rawuh panjenengan sedaya, saha boten saged nyawisaken papan tuwin palenggahan kanthi sae, kula nyuwun agunging pangaksami.

Kanthi pratela bilih ngrumaosi lepat dhumateng sesami, lajeng nyuwun pangampunten kanthi lahir tandhesing batos, sinatratan donga mugi-mugi Allah SWT paring ridho, kepareng nglebur dosa ingkang sampun sami-sami dipun tindakaken, punapa malih dipunjangkepi kanthi jawat asta, saestu mujutaken pakarti ingkang luhur.

Pungkasaning atur, dhumateng para kadang inngkang sampun paring pambiyantu sahengga saged kalesananipunn adicara ing wekdal punika, kula namung saged ngaturaken gunging panuwun, mugi kasaenan panjenengan pikantuk pituwas saking ngarsa dalem Allah SWT.

Mekathen para rawuh sekedhik tanggap wacana saking panitia.

Akhirukalam,

Wassalamu’alaikum warahmatullahi wabarokatuh.